EE2010 - ASU Electrical Engineering 2010: EE2010 - ASU Electrical Engineering 2010 -> eltayeb's Blog

Jump to content

Page 1 of 1

محمد صبحى فى واحد من الناس

Posted by eltayeb Icon, 29 May 2010 - 05:40 PM

الحلقة الاولى من البرنامج
اتكلم فيها عن قصة كفاحه فى المسرح و بدايته مع التمثيل
و اتكلم فى جزء عن ايمانه بالقومية العربية

الحلقة التانية كانت انبارح و اول لما تنزل على النت هحطها ان شاء الله
و اتكلم فيها مع قصته مع التلفزيون و ارائه السياسية و الاعمال اللى قدمها من بعد فيلم الكرنك
و اتلكم عن مسلسل فارس بلا جواد
و اتكلم عن مدينة سنبل الثقافية
اسيبكم مع الحلقة الاولى من البرنامج















الحلقة التانية ....قريباً

للسيدات حتى التاسعة مساءاً

Posted by eltayeb Icon, 25 March 2010 - 01:37 AM

ملخص الموضوع : دعوة للمساواة بين الرجل و المرأة
-----------------------------------------

محدش يستغرب ده حق مشروع للكل يجب ان يكون هناك مساواة فى كل شئ

زمان كان يقولك الست متاكل حقها
دلوقتى الرجالة حقها اتهضم خلاص

الناس اللى بتطلع بتطالب بالمساواة دى شايفة مين اللى مظلوم فى الوضع اللى احنا فيه؟
تعالو نحسبها كدة

نبدأ من او الزواج مثلاً
الراجل هو اللى بيشيل الليلة كلها على كتافه
من اول الاختيار لغاية الهدايا و الخروجات و العزومات و التجهيز و الفرح و خلافه

الراجل الغلبان هو اللى بيعزم يعنى مفيش حد بيخرج مع خطيبته مثلاً او مراته و هى اللى بتعزمه

و بعد الجواز هو اللى المفروض يشتغل عشان يصرف
حتى لو الست بتشتغل فى اغلب الاحيان مرتبها بيبقى ليها

مش كدة و بس حرية اختيار العمل او عدمه مكفولة للمرأة فقط دون الرجل
يعنى الراجل غصب عنه لازم يشتغل
انما الست براحتها حسب مزاجها يعنى

ده بالنسبة للمصاريف

تعالو نشوف باقى جوانب الحياة

الجماعة بتوع الغرب قالولك السيدات اولاً و ان ده من الزوق و الاتيكيت و مش عارف مين
اشمعنى يعنى فين المساواة

تعالو نشوف الخدمة العسكرية مثلاً او الجيش
حرام و الله
3 سنين زل فى الجيش
ليه الستات ميدخلوش الجيش و خصوصاً اللى بيطالبو بالمساواة دول
و الله ليتعلمو الادب من اول يومين
يومين ؟ من اول ساعتين
لأ كتير بردو
دول هيتعلمو الادب من ساعة التقديم اصلاً

اركب اتوبيس كدة
و حظك بقى لو لقيت كرسى فاضى
لو واحدة ست واقفة و لو انت محترم هتقوملها و تقولها اتفضلى
بص انا مش عاوزك تعمل كدة تانى
قولى ليه ؟

لو الست دى هى اللى قاعدة و انت كنت واقف هتقوملك؟
و الله لو انت مين محد هيعبرك

ندخل على المترو

تلاقى عربيات ستات بس
و عربيات ستات حتى التاسعة مساءاً
و الباقى مختلط

نفسى الاقى عربية مكتوب عليها للرجال فقط
او حتى للرجال حتى الساعة 9 الصبح بس

المضحك فى الموضوع انه بالرغم ان عربيات الستات بتبقى فاضية
الا ان الستات بيركبو فى العربيات المختلطة و اللى هى اصلاً مفيهاش مكان للنفس

انا قلت يمكن فيه حكمة فى كدة
سألت بنتين
بقولهم عربية الستات فاضية قالولى
هى ناقصة رغى ستات

صباح الفل يعنى

طيب يمكن دول بنات عاوزة تتعاكس مثلاً

انما الستات الكبيرة بتركب العربيات المختلطة ليه ؟
و يا ريت معاها راجل مثلاً هقول عادى مش مشكلة
انما تلاقى واحدة ست كبيرة راكبة هى و بنتها

طيب ليه ربنا موسعها عليكو و مديكو نعمة مش عاوزين تحافظو عليها ليه؟

return 0;

Posted by eltayeb Icon, 04 March 2010 - 10:33 PM

Posted Image

innovation

why?
اشمعنى يعنى الرمز العجيب بتاع المصباح ؟
و لما تلاقى الفكرة تلاقى المصباح نور

ليه يعنى ايه الفكرة فى كدة ليه الابتكار او ايجاد الحل دائماً مرتبط بهذا الرمز

طيب ما قبل اختراع المصباح الكهربى الناس كانت بتعمل ايه

بترسم لمبة جاز يعنى و للا ايه؟
السيد ارشميدس قالك وجدتها و لا كان فيه كهربا و لا حتى جاز

هو ممكن اختراع المصباح الكهربى يكون ساعد البشرية كتير جداً
و ممكن يكون ساعد فى ايجاد الافكار المبتكرة لانها غالباً مبتجيش للواحد الا بالليل و هو طاحن نفسه فى الشغل و سهران بيحاول
فأكيد ساعتها كان بيستخدم ضوء المصباح الكهربى غالباً

بس ده كان فى فترة او حقبة معينىة
الكلام ده انتهى تقريباً من الحياة
دلوقتى فيه مصابيح موفرة للكهرباء

الفلوروسينت
Posted Image

و الليدات كمان


Posted Image

ده غير ان اصلاً الواحد بيبقى قاعد يذاكر على الكومبيروتر يعنى غالباً مش هيحتاج لمض اصلاً

يا ترى لو بينا نلاقى رمز للاينوفيشن يتوافق مع التكنولوجيا الحالية هيبقى ايه الرمز ده؟

هل الرمز ده هيبقى فاليد عندنا فى مصر؟

هى هتيجى عليا انا

Posted by eltayeb Icon, 22 February 2010 - 07:32 PM

كنت رايح انهاردا المكتبة
ايوة يا عم المكتبة اصل انا صحابى كلهم مثقفين و كنت رايح مع واحد منهم عشان يستعير كتب

المشكلة مكنتش فى المكتبة
ابسلوتلى

و انا رايح قلنا نركب المترو
و بالفعل ركبنا المترو و نزلنا محطة مبارك
او محطة رمسيس زى الست اللى كانت ماشية ورانا مقالت لصاحبى متفولش فى وشى اسمها محطة رمسيس
و كان الرد اللى عجبنى الصراحة
"مكلهم فراعنة" طبعاً انا عملت نفسى معرفش الراجل ده و مشيت لوحدى

سيبك من الكلام ده

نزلنا محطة رمسيس و قلنا نغير عشان ناخد خط الجيزة
و احنا جايين نركب المترو لقينا عسكرى بيقولنا مفيش ركوب من هنا
و محدش يدوس على الخط الاصفر

فضلت مستغرب شوية كدة و ركبت من باب تانى
سمعت واحد فى الاذاعة الداخلية بيقول ان البابين اللى فى النص للصعود فقط
و البابين اللى على الطرفين للنزول

حسيت احساس عجيب و قلت الحمد لله مصر بتطلع بينا

نزلت فى المحطة المعهودة بعد 5 دقائق
لقيت العسكرى اللى المفروض انه واقف عشان يفهم الناس التعليمات قاعد على الكرسى مع واحد صاحيه
و ملهمش دعوة باللى بيحصلل و مين نازل و مين طالع

بس الحمد لله فيه امل اهو و المفروض متحصلش الزحمة اللى كانت بتحصل اثناء النزول و الطلوع

اثناء رحلة العودة بعد ساعتين تقريباً
مفيش عساكر اصلاً
الناس بتنزل و تطلع من اى مكان
المذيع الداخلى متفهمش راح فين

انا قلت اعمل مصلح اجتماعى و اقول للناس يمكن الموضوع جديد و محدش عرف و للا حاجة
و بالفعل الناس اللى كانت تنزل من باب الطلوع اتجهت ناحية باب النزول
احمدك يا رب فيه امل موجود اهو

المحطة اللى بعديها لقيت ناس عاوزة تنزل من باب النصعود بردو قلت اقول كمان نرة يمكن لسة طالع و للا حاجة
و لا حياة لمن تنادى قالى انا لسة هطلع قدام زحمة زحمة

و محطة اللى بعديها لقيت الراجل اللى واقف جنبى اللى المفروض سامع الحوار كله بينزل بردو من نفس المكان

محطة ورا محطة لعاية لما جت المحطة اللى المفروض هنزل فيها

لقيت واحد طالع من مكان النزول
قلتله و انا نازل الباب ده نزول بس
و الحمد لله انه ممدش ايدو و اكتفى بالشتيمة يبدو انه كانن مستعجل

الظاهر ان البلد بتحاول تطلع بينا و احنا مصريين ننزل بيها
من اول الماطن اللى محتاج عسكرى
و العسكرى اللى محتاج ظابط
و الظابط اللى محتاج .... الى اخره

هى الازمة ازمة ضمير و للا لا مبالاة و للا ايه الحكاية ؟
ليه كل واحد بيقول اشمعنى انا يعنى هى هتيجى عليا انا ؟

Filed in رحلة فى مترو الاتفاق

نفسى يبقى عندى بلوج

Posted by eltayeb Icon, 21 February 2010 - 07:48 PM

من زمان و انا نفسى يبقى عندى بلوج
ايوة
طيب ايه اللى منعنى؟
مش ده السؤال المهم

السؤال المهم هو انا ليه كان نفسى يبقى عندى بلوج ؟
بلاش السؤال ده
هو يعنى ايه بلوج و ايه اهميته؟

اسئلة كتيرة كنت بسألها لنفسى و احياناً مكنتش بلاقى الاجابة

اما مفهوم بلوج بالنسبالى
او على الاقل البلوج ده اللى اتمنى انى اكتب فيه موضوع تانى على الاقل
او حتى انى ممسحش الكلام اللى انا بكتبه دلوقتى و ادوس على بوست
عبارة عن رأيى او وجهة نظرى فى الاحداث اللى بتحصل فى المجتمع اللى انا جزء منه حتى لو انا رافض انى ابقى جزء منه

و يمكن يا سيدى حد يستفيد او انا نفسى استفيد منه لما اقراه تانى بعد فترة و اشوف تفكيرى اتغير من اللحظة دى و للا فضل زى ما هو
يعنى كنوع من تقييم الفكر مثلاً

طيب فاضل سؤال اللى هو السؤال الاول
ايه اللى كان منعنى؟
تقدر تقول كنت بفكر اكتر من اللازم فى اللى انا هكتبه و هكتبه ازاى و افكر فى اسلوب عشان اعرض الكلام
تفكير كتير و فعل قليل

عشان كدة قررت انى اكتب الموضوع ده دون تفكير
يعنى اللى هيجى فى دماغى هكتبه

و يمكن لو مكنتش عملت كدة مكنتش انت بتقرأ الكلام اللى انت بتقراه دلوقتى

كدة مش فاضل غير اخر حاجة
ادوس على بوست و للا لأ ؟
ايه ده انا لسه هفكر

Filed in اشمعنى انا يعنى؟

Page 1 of 1

0 user(s) viewing

0 Guests
0 member(s)
0 anonymous member(s)